Koeplet 1:
Eesj reej ‘r door ‘t dörp op ‘n awt fitske,
rammelend sjpatbord, en mit aafgesjlete benj
doe heurdes ‘m van wiets al, en dan wiste
“ha dao kump Joep”, dat reep me dan van alle kenj.
Mer noe inèns laef ‘r in weelde en ‘t ganse dörp zaet
“Zou ‘t zin dat Joep misjien de laoterie gewònne haet?”
sjiek kostuum, mer geine minsj wèt wie ‘t zit
dus zo gaw es m’n ‘m zuut, dan reup me dit!

Refrein:
Heij Joep, haet ‘t gebrend?
vreug ederein noe in ‘t dörp dae ‘m kent
Hae sjtòng bie ederein bekènd es ermoodzejjer
noe veurt ‘r cabrio en haet ‘r sjieke kleier
meh omdat d’r nemes is dae wèt wie of dat kènt
Vreug ederein ‘m noe “Heij Joep, haet ‘t gebrend?”

Koeplet 2:
Geine wèt ‘t, toch wilt ederein ‘t weite
M’n blif mer sjpikkeleere wo d’r ‘t van deit
Zou dae op zölder soms? Nae dat zou Joep noats doon toch!
meh wie zit dat dàn? wae zaet òs ‘ns besjeid?
In ‘t keffeeke op de hook hie – nae doe gluifs ‘t neet, jao ech –
sjteit Joep en geuf ‘t eine nao ‘t anger rundje weg
nog ummer wèt gein minsj wie ‘r d’raan kump
en wie ‘t kan dat hae noe in de sente sjwömp

Outro:
ederein kènt waal zo emes, bie wae dan de vraog ontsjteit
wie ‘r d’r aan kump, en wao d’r ‘t van deit